இப்பொழுதெல்லாம் பல பதிவுகள் சினிமா பற்றியே வருகின்றன , அதுவும் அயல் நாட்டுப் படங்கள் பற்றியது . 30 வருடங்களுக்கு முன்பு வந்த படங்களைப் பற்றியும் நம்மூர் பதிவர்கள் அலசி ஆராயும் பொழுது மனதில் கொஞ்சம் வருத்தம் வருகிறது .
ஏன் நம் தமிழ் மொழியில் நல்ல படங்கள் இதுவரை வந்தது இல்லையா ? நம் சொந்தப் படைப்புகளை நாமே கண்டுகொள்ளாமல் இருந்தால் வேறு யாரு வந்து சொல்வது ? அயல்நாட்டவரா ? நாம் அவர்கள் நாட்டுப் படைப்புகளை ஆகா ஓகோவென்று பாராட்டி எழுதுவதுபோல் அவர்கள் செய்வார்களா ? அதற்காக அயல் நாட்டு அறிவு நமக்கு வர வேண்டாமா ? குண்டு சட்டிக்குள்ளே குதிரை ஒட்டிக் கொண்டிருக்கவா ? என்று இடக்கு மடக்காக எல்லாம் கேட்க்க கூடாது .அயல் நாட்டு அறிவும் வேண்டும் , முதலில் நம்மை சுற்றி ஒரு நூறு கிலோமீட்டர் தொலைவினில் என்ன நடக்கிறது என்று தெரிந்து கொண்டபின் பல ஆயிரம் கிலோமீட்டர் தொலைவில் நடப்பதைப் பற்றி விலாவரியாய் அலசி ஆராயலாம் .
இங்கே பதிவுலகில் பலருடைய profile சென்று பார்த்தால் அங்கே தமிழ் படங்கள் , தமிழ் புத்தகங்கள் , தமிழ் எழுத்தாளர்கள் இருக்குமோ இருக்காதோ , நிறைய ஆங்கிலப் படங்கள் , ஆங்கிலப் புத்தகங்கள் , ஆங்கில எழுத்தாளர்களின் பெயர்கள் குறைந்தது நான்கைந்தாவது இருக்கும் . புரியுதோ புரியலையோ ஆங்கிலப் படங்கள் பார்க்கணும் , ஆங்கிலப் புத்தகங்கள் படிக்கணும் .அப்படி என்ன ஆங்கில மொழியின் மேலொரு மோகம் என்று தெரியவில்லை . ஆங்கில அறிவு வேண்டும் அதுவே நம் தமிழ் மொழியை மறக்கச் செய்யும் ஒரு ஆயுதமாய் மாறிவிடக் கூடாது . சராசரி வாழ்கையில் வரும் உரையாடலில் கூட பேசும் தமிழ் வார்த்தைக்கு அர்த்தம் தெரியலன்னு அதை ஆங்கிலத்தில் மொழி பெயர்க்கச் சொல்லும் கொடுமைகளும் நடக்கின்றன , அல்லது அப்படி தமிழ் புரியவில்லை என்று சபைதனில் கூறுவதை பெருமையாய் நினைக்கின்றனர் .உதாரணம் : ஆயிரத்தில் ஒருவன் - இப்படம் முடிந்து வெளி வரும்பொழுது இரண்டாம் பாதியில் பேசும் வசனங்கள் புரியவில்லை என்று பல குரல்கள் காதில் விழுந்தன . வருத்தப் பட வேண்டிய விஷயம் .
இப்பதிவுலகில் ஏதோ எழுதி நம் பதிவுகளின் எண்ணிக்கைகளை கூட்டுவது பெரிதல்ல . இருக்கும் தமிழர்கள் எல்லாம் பதிவர்களோ , எழுத்தாளர்களோ அல்ல . பதிவுலகை பற்றி அறிந்தோர் வெகு சிலரே . அவர்களும் அயல் நாட்டுப் படங்களைப் பற்றி பதிவுகளைப் போட்டு அதிகமான வோட்டுகளை வாங்குவதும் வருந்தக் கூடியது . எத்தனையோ நல்ல பதிவர்கள் இங்கு உள்ளனர் .உங்களுக்குத் தெரிந்த விசயங்களை மற்றவர் அறிய எழுதுங்கள் , அதுவும் பயனுள்ளதாய் , பதிவுலகிற்கு நான் புதிய வரவே . உங்களுக்கு அறிவுரை கூறுமளவிற்கு எனக்கு அனுபவமோ வயதோ இல்லை . சினிமா , புத்தகம் பற்றி எழுத வேண்டாம் என்று சொல்லவில்லை . எழுதுங்கள் அது நம் தமிழ் மொழியில் வெளி வந்துள்ள சிறப்பானப் படங்கள் புத்தகங்கள் பற்றியதாய் இருந்தால் அதைப் படிக்கும் நம் மக்களும் நம் மொழியில் தெரியாதவைகளைப் பற்றி தெரிந்து கொள்ள ஒரு பாலமாய் இப்பதிவுலகம் இருக்கட்டும் .
இந்த பதிவு நீண்டு விட்டது , என்னை பாதித்த படங்கள் , புத்தகங்கள் , எழுத்தாளர்கள் பற்றி மற்றுமொரு பதிவில் .
பி.கு . இப்பதிவு யாரையும் புண்படுத்துவதற்கு அல்ல .
என் ப்ளாக் 2 முறை தொலைந்து போனதால் மறுபடியும் அனைத்தும் பப்ளிஷ் பண்றேன் . இதை ஏற்கனவே படித்தோர் பொறுமை காக்கவும் . ட்ராப்ட் ல் வைக்க முடியாமல் ஒரு முழு back up எடுக்கவே இந்த முயற்சி
