ஒரு கிராமத்து காதல் கதை - 1

"ஏ மஞ்சு எப்போ ஊர்ர்ல இருந்து வந்த " என்ற சப்தம் கேட்டு குரல் வந்த திசையில் பார்த்தாள் மஞ்சு .

 அங்கே தென்னந் தட்டி மறைப்பில் இடுப்பில் இருந்த குழந்தைக்கு சோறு ஊட்டிக்கொண்டே நின்றாள் லட்சுமி .

 "காலைதான் வந்தேன் லட்சுமி உன் பசங்க எப்படி இருக்காங்க "

ம் ம் அவங்களுக்கு என்ன கொறைச்சல் எல்லாம் நல்லாத்தான் இருக்காங்க " .

"என்ன வந்ததும் வராதுமா எங்கே கிளம்பிட்ட ". 

"தம்பி அஸ்ஸாம் ல இருந்து வந்திருக்கானாம் அவனை பாக்கத்தான் சித்தப்பா வீட்டுக்கு போறேன் "

"சரி சரி போ ஊர்ல இருந்து வந்தா எல்லாம் நல்லா தேறி வருதுங்க நீ மட்டும் ஒருநாளுக்கு ஒருநாள் உள்ளேயே போயிட்டு இருக்கே "

"நீ சமைச்சு போட்டு உன் புருஷன் நல்லா வெயிட் போட்ட மாதிரி இருக்கு ......கொஞ்ச நாள் வந்து எனக்கும் நீ சமைச்சு போடேன் லட்சுமி நானும் நீ சொன்ன மாதிரியே தேறிருவேன்"

"ஏன் நான் நல்லா இருக்கது உனக்கு பிடிக்கலையா ? ............அம்மா இங்கே பாரு இவன் என் பந்த புடுங்கிட்டான் .முதல் உருப்படி அவளிடம் பிராது குடுக்க

"ஏலேய் எவம்ல அது என் மவன்ட்ட இருந்து பந்த புடுங்குனது .............என்றவாறே குடும்ப வேலையை பார்க்க லட்சுமி நகர மஞ்சுவும் தன் சித்தப்பா வீடு நோக்கி நடக்க ஆரம்பித்தாள்.

போகும் வழியெங்கும் வந்த நல  விசாரிப்புகளுக்கு நடுவில் லட்சுமியின் வாழ்க்கை பற்றி கடந்த கால  ஓட்டம் மஞ்சுவின்  மனதில் .

பத்து பதினைந்து வருடங்களுக்கு முன்பு அந்த தெருவில் இரவு எட்டு மணியானாலே

"மஞ்சு வீட்டுக்கு சாப்ட வா "

"லட்சுமி வீட்டுக்கு வா "

"ஏலேய் சுடலை வந்து படுக்கிறியா இல்லியால"

என்று என்னதான் பெற்றவர்கள் வீட்டில் இருந்து கத்தினாலும் எந்த குழந்தையின் காதிலும் விழாது .பெரும்பாலும் கிராமங்களில் ஒரு ஜாதி மக்களே இருப்பர் . அந்த ஒரு தெருவில் மட்டும் இருந்த முப்பது வீட்டுக்குள் ஐந்து ஜாதிகள் . ஜாதி மத பேதமில்லாமல் விளையாட்டு நடக்கும் தரையிலும் தண்ணீரிலும் .

கிளி வருது கிளி வருது என்று கிளியாந்தட்டு ஆடுகையுலும் , மலையிலே தீ பிடிக்குது பிள்ளைகளா ஒடுங்க ஒடுங்க என்று கை பிடித்து ஓடுகைளும் ஒருவரும் நினைத்து பார்த்திருக்க மாட்டார்கள் இந்த கூட்டத்தில் ஒரு ஜோடி பின்னாளில் தனி விளையாட்டு விளையாடும் என்று .                தொடரும் ....................