நட்பு - எதுவும் முடியும்-2

அதன் பின் வந்த நாட்களில் அரியர் பேப்பர் பேச்சுகளுடன் அப்பப்போ மாறிடுப்பா, வேண்டாம் , விட்ருப்பா என்ற அறிவுரைகளும் சேர்த்தே போனது . உலகிலேயே எளிமையான விஷயம்  அறிவுரை வழங்குவது , கஷ்டமான விஷயம் அதை கடைபிடிப்பது . இந்த இரண்டுமே எல்லையில்லா முடிவை நோக்கி போய்க் கொண்டிருந்தன . நடுவில் அவன் அரியர் பேப்பர் பாஸ் செய்திருந்தான் . குட்டிமா (நான் உருவத்தில் சின்ன பெண்ணாய் இருப்பதால் இவன் குட்டிமா என்றே அழைப்பான் )நான் பாஸ் செய்துவிட்டேன் என்று அவன் சொல்லும் பொழுது இந்தப் பையன் எப்போ மாறுவானோ என்று அவனை நினைத்து கவலையும் வந்தது .எல்லாம் ஒருநாள் முடிவுக்கும் வந்தது அவன் அம்மா வரையிலும் செய்தி போயிற்று பெற்ற மனம் எப்படித் தான் இதை ஏற்றுக் கொண்டதோ தெரிந்து கொண்ட அடுத்த நொடி இவன் கையோடு மதுரை கூட்டி செல்லப் பட்டான் . ஒரு நாள் போன் .

"நான் டெல்லி போய் சிவில் சர்வீஸ் படிக்க போறேன்மா "

"நீ நினைக்குற மாதிரி அது அவ்ளோ ஈசி இல்லை பா எப்படி படிப்பே நீ BE முடிக்கவே அந்த திணறு திணறிப் போனியே "

"இல்லமா அம்மா முகத்தை என்னால பார்க்க முடியல , என்னை அவங்க திட்டிருந்தா கூட கேட்ருப்பேன் அவங்க எதுவுமே கேட்கலைமா அதான் கஷ்டமா இருக்கு. வீட்டை விட்டு கொஞ்ச நாள் வெளியே இருக்கணும் அதுக்குதான் டெல்லி போறேன்  "

அவனை சங்கடப் படுத்தக் கூடாது என்று நினைத்தாலும் வந்த கோவத்தில் கண்ட மேனிக்கு திட்டி வைத்தேன் . பின்பு டெல்லியும் போய்விட்டான் . போய் நான்கு மாதத்தில் .

"என்னால இங்கே படிக்க முடியல இங்கே எல்லாமே தப்பா இருக்கு எதுக்காக என்னை அம்மா வீட்டுக்கு கூட்டிட்டு போனாங்களோ மறுபடியும் நான் மாறிடுவேனொன்னு பயமா இருக்கு "

இதென்ன வம்பா போச்சு எங்கே போனாலும் இவன் கெட்ட நேரம் இவனை விடாது போல இருந்தது .

"உன்னால முடிஞ்சா படி இல்லேனா கிளம்பி வந்துடு "

வந்துட்டான் , வந்து ME ஜாயின் பண்ணிவிட்டதாய் சந்தோசமாய் சொன்னான் . இன்று அவன் கடந்தகால வாழ்கையில் இருந்து முற்றிலும் வெளியே வந்து நல்ல பிள்ளையாய் படிக்கிறான் . ஒருநாள் அவன் தொண்டை கரகரக்க பேசிக் கொண்டிருந்தது

" நான் இந்தளவு  மாறுவேன்னு நினைச்சுக் கூட பார்கலைமா, இப்போ சந்தோசமா இருக்கேன் . எப்படிமா எல்லாம் தெரிஞ்சும் நீ என்கிட்ட நீ எந்த வித்தியாசமும் காட்டாம பேசினே ? நான் வீடு வந்து இந்த ஒரு வருஷத்தில் நீ பழைய விஷயங்கள் எது பத்தியுமே என்கிட்ட பேசாம என்ன கொஞ்சகொஞ்சமா மாத்தினே . அடுத்த ஜென்மத்தில் உனக்கு நான் பிள்ளையாய் பொறக்கணும் . friendship நா என்னன்னு எனக்கு புரிய வச்சதே நீதான்மா .............." பேசிக்கொண்டே இருந்தான் . ஆமாம் அவன் கடந்த கால தவறை பற்றி அதன் பின்பு அவனிடம் நான் பேசவே இல்லை . மனிதன் வாழ்க்கையில் தப்பு செய்வது சூழ்நிலைக் கைதியாய் என்பதை நான் புரிந்திருந்தேன் .

எந்த ஒரு பண்டிகைக் காலமானாலும் எனக்கு வரும் முதல் வாழ்த்து இவனிடமிருந்துதான் . அவன் என்னைப் பற்றி பேசியவை எனக்கு சிரிப்புதான் வந்தது ஆனா சிரிக்கல அவன் ரொம்ப பீல் பண்ணி பேசிட்டு இருக்கிறான் . வெரி சிம்பிள் நட்புதான் "உடுக்கை இழந்தவன் கைபோல ஆங்கண் இடுக்கண் கலைவதாம் நட்பு " கடைசிவரை அவனுடனான் என் நட்பை நான் முறிக்க வில்லை . கத்தி கத்தி பேசி புரிய வைக்க முடியா விஷயம் மென்மையான வார்த்தைகளால் கூட புரிய வைக்க முடியும் . ஒரு தப்பு  செய்யும்பொழுது அதை எடுத்து சொல்லி முதலில் புரிய வைப்பதும் நட்புதான் .

பெண்களாலேயே கெட்டுபோன அவன் வாழ்கையில் இன்னமும் ஒரு பெண் தோழியாய் நான் . இது ஒரு சுய சொறிதல் அல்ல . பொறுமையுடன் கையாண்டால் எவரையும் மாற்ற முடியும் என்ன கொஞ்சம் நாட்கள் போகும் .  இதுவரையிலும் என் பிரெண்ட்ஸ் கிட்ட கூட பகிர்ந்து கொள்ளாத விஷயம் இவனின் கடந்கால வாழ்க்கை . இங்கே பதியக் காரணம் இவனைப் போல் உங்களுக்கும் ஒரு நண்பன் இருக்கலாம் எந்த காலத்திலும் அவனை விட்டு விலகாமல் எடுத்து சொல்லி புரிய வைத்து நல்ல நட்பை மற்றவர்களுக்கும் உணர்த்திடுங்கள் .