ஒரு பெண்ணின் திருமண எதிர்பார்ப்புகள்

  என் கல்லூரித் தோழி விடுதியிலும் பெரும்பாலான சமயங்களில் சேர்ந்தே இருப்பது வழக்கம் . கழுத கெட்டா குட்டிச்சுவரு என்பது மாதிரி நாலு பொண்ணுங்க ஒன்னு சேர்ந்தா ஒன்னு ஆண்களைப் பற்றிய பேச்சா இருக்கும் இல்லைனா கல்யாணம் பற்றிய பேச்சா இருக்கும் . அனேக முறை கல்யாணப் பேச்சுதான் நடக்கும் .அந்த மாதிரியான ஒரு விவாதத்தில் ஒருமுறை உனக்கு எந்த மாதிரியான திருமணம் வேண்டும் என்று கேட்டோம் ,உன்னுடைய வருங்கால கணவரைப் பற்றிய உன்னுடைய எதிர்பார்ப்புகள் என்னென்ன என்று கேட்கும்பொழுது அவள் சொன்னவை, அதற்கு முன் அவளைப் பற்றிய ஒரு சிறு அறிமுகம் . ஆள் சுமார்தான் , பார்த்தவுடன் திரும்பிபார்க்க வைக்கும் அளவுக்கு அழகு அல்ல , இடுப்பு வரை கருகருவென்று நீண்டு கிடக்கும் கூந்தல் மேல் மட்டும்  பல பெண்களுக்கு பொறாமை உண்டு . நம் இந்தியப் பெண்களுக்கான சராசரி உயரம் ஒல்லியான தேகம் . ஆனால் அவள்  ஆண் பெண் என்ற பாகுபாடன்றி எல்லோரிடமும் சகஜமாய் பழகும் பெண் . அதனாலேயே அவளின் நட்பு வட்டம் கொஞ்சம் பெரியது . இனி விசயத்துக்கு வருவோம் . அவளின் எதிர்பார்ப்புகள் இனி ஒரு நேர்முக வடிவில் ,அவளுடைய பெயர் வர்ஷினி என்று வைத்துக்கொள்வோம் .

கேள்வி : உனக்கு பிடிச்சது காதல் திருமணமா ? பெற்றோர் பார்த்து வைக்கும் திருமணமா ?

வர்ஷினி  : காதல் திருமணம் முதல் சாய்ஸ் காதலே அமையாத பட்சத்தில் பெற்றோர் விருப்பம் .

கேள்வி : உன் வருங்கால கணவர் எப்படி இருக்க வேண்டும் ?

வர்ஷினி  :படிச்சவரா இருக்கணும் , நிறைய சம்பாதிக்க வேண்டும் என்று இல்லை , வாழ்க்கைக்கு தேவையான அளவு வருமானம் இருந்தால் போதும் . அக்கம் பக்கம் பார்த்து அதிகப்படியாய் ஆசைப்படும் பெண்ணல்ல நான் . அதனால பணம் வச்சு பிரச்னை இல்லை . ஆண் ஆணாய் அவருக்குரிய மிடுக்குடன் இருக்கணும் . கூஜா தூக்குற ஆள் மட்டும் வேண்டவே வேண்டாம் . சின்னச் சின்னச் சண்டைகள் வரணும் பிறகு ஒரு சமாதானம் வரணும் , எதற்க்கெடுத்தாலும் ஆமாஞ்சாமி போடக்கூடாது , என்னுடைய உணர்வுகளுக்கும் மதிப்பு கொடுக்கணும் . (எங்களுக்குள் "மிதிக்காம இருந்தா சரிதான்" ).

கேள்வி :காதல் திருமணம் என்றால் எந்த மாதிரி இருக்கணும் ?

வர்ஷினி  :கலப்பு திருமணம் என்றால் சரி . ஆனால் மதம் மாறி  மட்டும் திருமணம் பண்ண மாட்டேன் . இத்தனை வருசமாய் ஒரு இந்துவாய் வளர்ந்தவள் நான் . என்னுடைய குழந்தையும் ஒரு இந்துவாதான் வளரனும் . (எங்களுக்குள் "ஏன் கோவிலுக்கு நேர்ந்து விடப் போறாளா ")

கேள்வி :சரி உன் வீட்டுக்காரருக்கு சமைச்சு போடுவியா ?

வர்ஷினி  :சற்றே கோவத்துடன் , யாரைப் பார்த்து என்ன கேள்வி கேக்குறீங்க நான் நளனுக்கு தங்கட்சியாக்கும் (நாங்க "நளன் இருந்து கேட்ருந்தா இந்நேரம் தூக்குல தொங்கிருப்பார் ) . ஒரு ஒல்லிப்பையனை கல்யாணம் பண்ணி என் சமையல் சாப்பிட்டு குண்டாக்கி காட்டுறேன் பாருங்க . அவங்க வீட்ல எல்லாரும் ஆச்சரியப்படணும் .(எங்களுக்குள் " ஆமாமா அப்புறம் வாசலை கொஞ்சம் அகலப் படுத்தாம இருந்தா சரி ")

கேள்வி  : சரி உனக்கு ஒரு பையனை பிடிச்சிருந்தா கல்யாணம் பண்ணிக்கலாம் என்று விரும்பினால் அவனிடம் உன் காதலை நீ வெளிப்படுத்துவியா ?

வர்ஷினி : என்னைப் பொறுத்த வரைக்கும் என் மனசுல ஒரு பையன் இடம் பிடிப்பதை விட என்னிடம் பழகும் அந்தப் பையன் மனசுல தோணனும் , இவ நமக்கு ஏற்றவள் , நம்ம குடும்பத்துக்கும் ஏற்றவள் இவளை திருமணம் செய்யலாம் என்று . என் பழக்க வழக்கம் , குணம் , படிப்பு , அழகு என்று பிடித்து என்னிடம் அவன் தன் காதலைச் சொன்னால் எனக்கும் அவனை வேண்டாம் என்று சொல்ல காரணம் இல்லாத பட்சத்தில் வீட்டில் சொல்லி திருமணம் செய்வேன் . பெத்தவங்க சம்மதம் இல்லாம பண்ண மாட்டேன் . கண்டிப்பா அவர்கள் சம்மதிக்க வச்சுடுவேன் , இது வரை என் சம்மந்தப்பட்ட  என்னுடைய முடிவு எதுவும் தப்பானது இல்லை , அது என் வீட்டாருக்கும் தெரியும் .(எங்களுக்குள் "இவகிட்ட காதலை சொல்றவன் ரொம்ப பாவம் ")

கேள்வி  :திருமணதிற்கு பிறகு கணவர் குடும்பம் உன்னுடன் இருந்தால் ஏற்றுக்கொள்வாயா ? (மாமி , மாமா , தங்கை , தம்பி )

வர்ஷினி :நானும் பெரிய குடும்பத்துல பொறந்து வளர்ந்தவதான் . யார் இருக்காங்களோ இல்லியோ மாமியார் கண்டிப்பா என்கூட இருக்கணும் . என் தலை பூ கூட சீக்கிரம் வாடாது அதனால என் மாமியார் ஆயுள் கெட்டியாம் , (எங்களுக்குள்"அப்போ சீக்கிரம் உன் புருசனுக்கு முடி கொட்டிரும் , சண்டை தீர்த்து முடியாதே ") உங்கள மாதிரி ஆட்களை சமாளிச்சு பழக்கம் இருக்குறதால மாமி கூட சண்டை போட மாட்டேன் , நீங்களே எத்தனை மாமிகளுக்கு  சமம் .(இது நிஜம் விடுதியில் தங்கிப் படிச்சாலே மத்தவங்களை எளிதில் புரிந்து கொள்ளலாம் , ஒருஒரு பெண்ணும் ஒருஒரு மாதிரி இருப்பாங்க , சூடு சொரணை எல்லாம் ரொம்ப கம்மியாதான் இருக்கும் , இது இருந்தாதானே மாமியார் மருமகள் சண்டை வரும் .)

 கேள்வி  : எங்களுக்கு நீ சொல்ல விரும்புவது ?

வர்ஷினி : உங்க ஆத்துக்காரருக்கு வீட்டு சமையல் போரடிக்காம பார்த்துக்கோங்க , ஹோட்டல் தேடி போக விடாதீங்க அது உங்களுக்குத்தான் கஷ்டம்.ஹோட்டல் சுவை பிடிச்சு போச்சுன்னா அப்புறம் உங்க சமையல் பிடிக்காது  (எங்களுக்குள் "ஹோட்டல் போய் சாப்பிட்டா சமைக்குற வேலை மிச்சம் இதுல கஷ்டம் என்ன இருக்கு 

") 

வர்ஷினி : அடிப்பாவிங்களா  நான் சொன்னது சமையல் இல்லை , வீட்டு சமையல் -நீங்க , ஹோட்டல் சமையல் - உங்களுக்கே புரிஞ்சுருக்கும் .

ஒட்டுமொத்தமாய் நாங்க அவளின் பதிலில் வாய் மூடாமல் ரொம்ப நேரம் அப்படியே நின்னோம் .

இப்பெண்ணின் எதிர்பார்ப்புகள் சரியா ?

இந்த பேச்சின் நடுவில் என்னிடமும்  கேட்க , நானும் எனக்கு ஜோசியர் மாப்பிள்ளை நார்த்திலிருந்து வருவார் என்று சொன்னார் என்று பலமுறை சொல்ல , ஒருமுறை அவர்கள் உனக்கென்ன மாப்பிள்ளை வட இந்தியாலிருந்து வரப் போறார்  என்று சொல்ல அப்போதான் எனக்கு எல்லாம் புரிஞ்சது . அது வட இந்தியா இல்லை , என் வீட்டிலிருந்து வட திசையில் மாப்பிள்ளை அமையும் என்று ஜோசியர் சொன்னதாய் பிறகு சொல்ல அவர்களின் (ஒரு பத்துபேர் )ஒட்டுமொத்த  பார்வையும் என்மேல் .என் நல்ல நேரம் அன்னைக்கு அடி வாங்காம தப்பிச்சேன் . (வட திசையை நான் ஆங்கிலத்தில் நார்த் என்று சொன்னதால் வந்த குழப்பம் அது )