வாழைப்பூ மொட்டு குழம்பு -மீன்குழம்பு வடிவில்

தலைப்பை பார்த்ததும் குழம்பி போனவர்களுக்கு , இது ஒரு தூத்துக்குடி செய்முறை குழம்பு .

தேவையானவை :

*.வாழைப்பூ எண்ணிக்கை சாப்பிடும் நபர்களை பொருத்தது
* தக்காளி பழம் 2
* மல்லித்தூள்
* சீரகம் , மஞ்சள் , வத்தல் எல்லாம் கலந்த மசாலா பொடி
*புளி கரைசல்
*சின்ன வெங்காயம்
*தேங்காய்
*உப்பு 
செய்முறை :
வாழைப்பூ பாதிக்கு மேல் நரம்பு எடுக்க முடியாத அளவில் இருக்கும் நுனி மொட்டுகளை மட்டும் தனித்தனியே பிரித்து வைத்துக் கொள்ளவும் . சின்ன வெங்காயம் , தேங்காய் சேர்த்து நன்று அரைத்து வைத்துக் கொள்ளவும் .பிரித்து வைத்த மொட்டுகள் ,புளி கரைசல் , மேல் சொன்ன மசாலா வகைகள் , நறுக்கிய தக்காளித் துண்டுகள் , அரைத்த தேங்காய் , உப்பு , தண்ணீர் சேர்த்து நன்று வேக வைக்கவும் . குழம்பு கெட்டியாய் வந்ததும் கறிவேப்பிலை , கடுகு போட்டு தாளித்து இறக்கி பரிமாற அயிரை மீன் குழம்பு மாதிரி இருக்கும் . வாழைப்பூ சேர்த்துக் கொள்வது உடலுக்கும் நல்லது . சிறுநீரகக் கற்களை கரைக்கும் மருத்துவக் குணம் இதற்குண்டு .
முன்னே பதிவிட்ட நிஜ மீன் குழம்பு மீண்டும் ஒருமுறை கிழே (ப்ளாக் காணமல் போனதால் மேல் பதிவேற்றம் )

  மீன் குழம்பு செய்முறை

 அசைவ உணவுகளில் மீன் குழம்பு பலரின் அசைவ லிஸ்டில் முதலில் இருக்கும் எனக்கும் கூட . அதுவும் நான் வைக்கும் மீன் குழம்பு நான் மிக விரும்பி சாப்பிடுவது . நான் வைக்கும் மீன் குழம்பின்  சுவைக்கு ஒரு கூட்டமே உண்டு . செய்முறை ஒருஒரு இடத்திற்கு மாறுபடுகிறது .இங்கு நான் வைக்கும் மீன் குழம்புக்கான செய்முறை இதோ ,

தேவையானவை :

மீன்                                       - 1 /2  kg
தக்காளி                              -2
பச்சை மிளகாய்               - 3
சாம்பார் வெங்காயம்     -100 கிராம்
மாங்காய் சிறியது           -1 
புளி                                        - 25  கிராம்
தேங்காய்                            -75  கிராம்
(மஞ்சள் , காய்ந்த மிளகாய்,சீரகம் ,காய்ந்த  மல்லி ) தூள்
தாளிக்க எண்ணெய், கடுகு , கறிவேப்பிலை .

செய்முறை :

மீன் துண்டுகளை அலசி வைத்துக்கொள்ள வேண்டும் . தேங்காய் , ஒரு 4  சாம்பார் வெங்காயம் , கொஞ்சம் கறிவேப்பிலை சேர்த்து நன்கு பட்டுபோல் அரைத்துகொள்க, (கறிவேப்பிலை தனியாய் எடுத்து வைத்து சாப்பிடுவதால் அதிலுள்ள சத்துகள் நமக்கு கிடைப்பதில்லை ), மாங்காய் , சாம்பார் வெங்காயம்,தக்காளி  இவற்றை சிறு சிறு துண்டுகளாக நறுக்கி கொள்ள வேண்டும் . இதனிடையே புளியை ஊறவைத்துகொள்க .பச்சை மிளகாயை நடுவில் இரண்டாக கீறி வைத்துகொள்ள வேண்டும் . பாத்திரத்தில் மீன் துண்டுகள் , அரைத்த தேங்காய் கலவை , வெட்டிய மிளகாய் , சாம்பார் வெங்காயம் , மாங்காய் , தக்காளி , புளி கரைசல் , உப்பு , (மஞ்சள் , காய்ந்த மிளகாய்,சீரகம் ,காய்ந்த  மல்லி ) தூள் தேவையான அளவு , 1 /2  லிட்டர் தண்ணீர் எல்லாம் சேர்த்து மூடி அடுப்பில்  வைத்து கொதிக்க வைக்க வேண்டும்  . ஒரு 20  நிமிடம் கழித்து தண்ணீர் ஓரளவு வற்றியபின் இறக்கி , எண்ணெய் , கடுகு , கறிவேப்பிலை , சாம்பார் வெங்காயம் மிக சிறிய துண்டுகள் போட்டு தாளித்து குழம்பில் ஊற்றவும் . மீன் குழம்பு ரெடி .
பி.கு :
*குழம்பு வேகும்போது கரண்டி போட்டு கிண்ட கூடாது மீறினால் முடிவில் மீன் முள்ளே மிஞ்சும் .


*வேகும்போது ஒரு 15  நிமிடம் அப்புறம் சுவை பார்த்து காரம் , உப்பு சேர்த்து கொள்ளலாம்


*மாங்காய் , போடாமலும் செய்யலாம் . போட்டால் சுவை கூடும் , அதிலும் கொஞ்சம் சதையுடன் போடும் மாங்கொட்டை கூடுதல் சுவை (எனக்கும் , அக்காக்கும் இதிலே செம சண்டை வரும் )